ميشال ضاهر اتفقوا جميعا على حرمان طائفة الروم الكاثوليك
اعترض النائب ميشال ضاهر في بداية الجلسة النيابيّة على حرمان طائفة الروم الكاثوليك من رئاسة أي لجنة ويعتبر أن الأحزاب التي كادت أن تودي بالبلد الى خرب أهلية قبل الانتخابات ، اتفقت مع بعضها البعض اليوم وتهدر حقوق الطائفة
وقال ضاهر موجها كلامه للرئيس بري أتمنى الغاء الطائفية اليوم قبل الغد ولكن لا يمكن اعتماد المعايير الطائفية والاعراف وعندما يصل الامر الى الكاثوليك يتفّق الجميع على تهميشهم
وطالب ضاهر نواب الطائفة بأخذ موقف الى جانبه.
وقال النائب ميشال ضاهر من داخل الجلسة: الكلام اللي بدّي قولو كنت بتمنّى ما قولو بس مجبور بسبب كل اللي صار بآخر كم يوم، للأسف الأحزاب بتتنافس قبل الانتخابات وبترفع شعارات منحسّ انو رح توصّلنا لحرب اهليّة، وبعد الانتخابات بتتفق مع بعضا وبتقسّم اللجان بين بعضا.
وقال ضاهر : نحنا اكيد مش ضد التقارب ولا ضد التوافق، بس نحنا ضد انو يكون هالتوافق على حساب الطوائف، في معيار طائفي عم يُعتمد بتوزيع رئاسة اللجان، ولكن للأسف في ظلم كبير لاحق بطائفة الروم الكاتوليك يللي ما عندا ولا لجنة أساسيّة، بينما مثلاً الطائفة الأرمنية الكريمة ويللي منحترما عندا لجنة، أكيد هيدي اللجان مش ملك الطوائف، ولكن او بينحكا بالمعيار الطائفي وبيطبّق عالكل، او خلّينا ننسى تماماً هالمعيار وننسى الاعراف يللي بتوزّع اللجان، على الطوائف.
وأكمل ضاهر موجها كلامه الى الرئيس بري حضرتك دولة الرئيس ما بتقبل الظلم، واسمحلي قلّك انو في ظلم لاحق بطائفة الروم الكاتوليك. وعم اطلب لجنة مش لإلي شخصيّاً، وأي نائب من الطائفة بيوصل لرئاسة لجنة أساسيّة بيكون وصلني حقّي.
اضاف ضاهر : كنت بتمنّى من زملائي بالمجلس وبالطائفة إنّو يكونو حدّي بهالمطلب ويوفّقو بين انتماؤن السياسي او الحزبي وبين تمثيلن لطائفة، وعقبال ما نوصل لمواطنة حقيقيّة خارج كل انتماء طائفي، بيبقى يللي عم اطلبو مطلب حقّ بتمنّى على رئاسة المجلس تاخدو بعين الاعتبار وما تقبل بتكريس الظلم.
