شعب منافق يعشق جلاديه..وهذا ما فعلناه بك!
كتب فؤاد سمعان فريجي
سرقنا لك أموالك وجنى عمرك ، وبعدك بتجي لعنا تتوسل لنا ان نعطيك منهم ١٠٠ دولار
لقد سرقنا رصيدك يلّي كان دولار وعملناه لبناني على ال ١٥٠٠ ل.ل.
انشأئنا منصة صيرفة وسحبنا منك على الناعم ما تبقى من اموال ليستفيد منها زعران ومافيا التجار وعصابات الأحزاب والزعامات
رفعنا سعر ربطة الخبز ووقفت متل الشاطر امام الأفران
خليناك تنام بالسيارة امام محطات البنزين وعملنا سوق سوداء وبدك رضانا وصرت تعمل واسطة حتى نعطيك حقك
خفينا الأدوية وبطلنا نجيب دواء مدعوم ورفعنا سعرها بشكل جنوني وخليناك تترجانا حتى نبيعك الدواء بالحبة
رفعنا سعر المازوت والغاز وعملنا عليك مقلب انو المواد الغذائية مقطوعة وركضت ورانا لنبيعك علبة حليب وسمنة وما حكيت .
خليناك تدفع كاش قبل ما تفوت عالمستشفى ورفعنا معاينة الحكيم لل ١٠٠ دولار وما فتحت تمك .
ما خلينا تمشي الكهرباء لان استبدلنها بالمولدات والإشتراك وانت راضي عم تدفع متل الشاطر
غلينا إشتراك المياه بأضعاف خيالية دون أن تصلك المياه وخليناك تعبي من الصهاريج.
رفعنا اقساط المدارس والجامعات بشكل خيالي وكنا ننظر منك تمرد ، لاقيناك عم تركض حتى تدفعلنا
رفعنا رسوم الموبايل والهاتف الأرضي والإنترنت والمعاملات الإدارية رفعنا سعرها أضعاف ومتل الشاطر عم تركض ورانا لتدفع
سرقنا تعب العسكر الشرفاء والمتقاعدين الاوادم
ولم يرف لنا جفن .
هيدا غيض من فيض واللي تبين خلال هيدي الفترة اننا شعب ( لا اعمم ) متستر خلف الأقنعة ويستحق على كل ما حل به .
الاحد ١٨ آب ٢٠٢٤
